Wat is der in de hunebedden vunden?

In de hunebedden lag een vlintenvloer, een vloer maakt van kleine vlinten. Bij opgravings wuurden ok ofscheidings in de grafkamer vunden. Dus meugelijk was de grafkamer in verschillende ruumtes verdield, zie hierunder. Het lek der op dat de lieken op de vlintenvloer hen legd zint met daarum hen grafgiften. Bezunder is de grote hoeveulheid spullen (ok wal grafgiften nuumd) die in de hunebedden vunden zint. Dizze spullen wuurden metgeven veur de reis naor het hiernaomaals en/of veur het twiede leven. Wij weet in Nederland niet in wat veur holding de lieken bijzet wuurden, in Duutslaand vind wij dooien in gehurkte holding, maar ook langoet.

Wat vindt archeologen an spul in de hunebedden?

Zie vindt allerlei grafgiften: heur gerak (gereedschap) en wapens (piel en boog, bielen, vuurmaakset, etc.), potten met eten en drinken en sieraoden (krallen van tanden, barnstien, git en fossiel).

Hoe zag een begrafenis der in de tied van de hunebedbouwers oet?

Een begrafenis (ok wal bijzetting nuumd) bestun oet een liek bijzetten in het hunebed waorbij vuur, meziek, eten en drinken een rol speulde. Het liek wuur misschien in linnen of leer wikkeld. In Zweden zint der anwiezings dat de dooie in leer wikkeld wuur. Het liek wuur met goed an en sieraoden henlegd met um hum of heur hen potten met eten en drinken, gerak en wapens.

Wel wuurden in de hunebedden begraven?

Niet elkenien wuur in een hunebed begraven, der waren kleinere graven: stienkisten en vlakgraven. Der lek gien verschil te weden in de grafgiften in stienkisten, vlakgraven en hunebedden. Er zint dus gien anwiezings dat de leiders begraven wuurden in een bepaald graf. Misschien dat de leiders begraven wuurden in een hunebed, maar het kan ook best zo weden dat zie juust in stienkisten of vlakgraven begraven wuurden.

In hunebedden zint amper botresten antröffen en wij kunt dus moeilijk oetspraken doen over de verholding mannen en vrouwen en de leeftijd van de dooien. In Duutslaand en Zweden zint wál botresten bekend. Wij weet ok dat de mèensen oet latere periodes de hunebedden als graf gebroekten. De hunebedbouwers wuurden begraven in een gehurkte holding op de zied, mar der zint ok anwiezings veur crematie.

Vertaling in het Drents Willy Weerman