D39 vörmt met D38 en D40 een trio dat vlak boven Emmen op een heideveld in het Valtherbos leg. Al zint de zandwegen vanoet Vaalth as ok vanoet Emmen veur auto’s goed beriedbaar, ij loopt kaans op een bekeuring want het bos is kuier- en fietsgebied. Nim liever het prachtige asfalteerde fietspad dat langs de hunebedden löp. D38 (de miest noordelijke) stelt niet veul meer veur. Oorspronkelijk was het een middelgroot hunebed met 5 dekstienen. Der zint non nog 2 en die zint ok nog van de draagstienen ofgleden en ligt half op de bodem. De 11 zied- en sluutstienen zint zowat under het zaand verdwenen. De vörm van de oorspronkelijke dekheuvel is nog wál te herkennen.
D39, op 25 meter ofstand van D38, is umringd deur een ronde zaandwal; het restant van de oorspronkelijke dekheuvel. De 8 zied- en sluutstienen zint der allemaol nog, maar zie ligt diep in het zaand. Ién vrij platte dekstien leg op de draagstienen, Der zult vast ooit 3 west weden. Van oorsprong dus ok een klein graf.
Locatie D39
Bezuuk Professor van Giffen 1918
Op grond van de foto zuj het niet zeggen, maar toch schref Van Giffen : “Het hunebed is weliswaar door het ontbreken van D_1 en D_3 (dekstienen) onvolledig, doch overigens blijkbaar nog in tamelijk oorspronkelijken staat”. De 2 sluutstienen en 3 paren ziedstienen zint der namelijk wal mar ligt zowat hielemaol under het restant van de dekheuvel verscheulen. Vandaag de dag zint zie dudelijker zichtbaar. De iene overbleven dekstien leg op het middelste paar ziedstienen. Net als D38 wuur dit monumentie dat 4,4 bij 2,5 m groot is, in 1871 rijkseigendom.
(Bron: Atlas bij “De Hunebedden in Nederland”, dr.A.E.van Giffen, 1925)
Meer informatie over dizze en aandere hunebedden in Drenthe zie www.hunebedden.nl en www.hunebeddeninfo.nl
Tekst Hans Meijer
Fotografie Hans Meijer en Davado
