D40 vörmt met D38 en 39 een trio dat vlak boven Emmen op een heideveld in het Valtherbos leg. Vanoet het noorden giet de verharde weg deur de bos over in een niet veur auto’s toegankelijke zaandweg. IJ kunt wieder lopen, maar dat is een beheurlijk èende. Nim liever de fiets want der löp een prachtig asfalteerd fietspad langs de hunebedden. Ok vanoet Emmen zint de hunebedden via die weg bereikbaar. D40 is de interessantste van het drietal. Hij hef mar twie, mar wal forse dekstienen die nuver op de veer ziedstienen en de twie sluutstienen ligt. Der is nog ién poortstien, de aandere is markeerd met een plombe.
In 1918 was dit hunebed nog diels verscheulen under zien dekheuvel. Reden veur Van Giffen um de structuur van die grafheuvel te underzuken. Der bleken een hiele bult vlinten (veldkeien, de z.g. steenpakking) in de heuvel te zitten. Van Giffen vund hier aanwiezings veur een anvoerweg naor de top van de heuvel waor de dekstienen langs sleept zint. In de grafkelder tröf e de ontbrekende poortziedstien an. Mar hie hef hum niet herplaotst. Het aantal antröffen artefacten vuul niet met: een aantal lösse potscharven en een drietal stienen warktuigen. De heuvel wuur nao het underzuuk weer hersteld. Mar later möt e opnei oetgraven weden.
Drie kleine hunebedden vlak bij mekaar. Waorum niet ién grote? Misschien zint zie deur opienvolgende generaties bouwd. Wij zult het nooit weten.
Locatie D40
Bezuuk Professor van Giffen in 1918
Van Giffen lat op de foto dudelijk de veur een groot diel nog complete dekheuvel zien . Hij schref dan ook: “Het hunebed is, op de poort na, ongestoord en verkeert blijkbaar in den oorspronkelijken staat”. Veur hum anleiding um die heuvel later veul oetgebreider te underzuken. De 2 sluutstienen en de 2 paren ziedstienen die de 2 dekstienen draagt zit in de heuvel verbörgen. Hij treft nog 1 poortstien an. Het monument wuur in 1871 riekseigendom.
(Bron: Atlas bij “De Hunebedden in Nederland”, dr.A.E.van Giffen, 1925)
Meer informatie over dizze en aandere hunebedden in Drenthe zie www.hunebedden.nl en www.hunebeddeninfo.nl
Tekst Hans Meijer
Fotografie Hans Meijer en Davado
