Meer as 5000 jaor leden hef de architect van D45 het zu’k bij de keuze van de locatie en de grootte van dit hunebed extra moeilijk maakt. Dit stiengraf leg n.l. boven op een flinke bult. Denk de oorspronkelijke dekheuvel der overhen en ij hebt een klein barggie. D45 hef nog zes van de oorspronkelijke negen dekstienen. Daorvan rust der nog drie min of meer op de draagstienen, de aandere drie zint der half ofgleden. De miest rechtse dekstien is de briedste en de platste stien die op een hunebed te vinden is. De prehistorische bouwers hebt de stee van de draagstienen en het aantal (3) dudelijk an de maot van dizze stien anpast. D45 telt wieder 19 zied- en twie sluutstienen. Het hunebed wordt umringd deur 13 kransstienen; de 25 ontbrekende zint deur Van Giffen met plombes markeerd. Ok zint der nog twie poortziedstienen.
Routebeschrieving
Het hunebed leg dichtbij het stadscentrum in de Emmerdennen, niet wied van de grote weg mar het bos is verbeuden veur gemotoriseerd verkeer. Der is een parkeerplaots aan de Boermarkeweg, niet zo wied van het hunebed. Mar ok vanof het NS-station loop ij der in 10 minuten hen.
Bezuuk Keuning Lodewijk Napoleon Bonaparte
Op bovenstaonde foto is te zien hoe het der in 1809 oetzien hebben möt toen Keuning Lodewijk Napoleon Bonaparte volgens overlevering met peerd en al boven op de grote platte dekstien van D45 sprung. De keuning dee in dat jaor tiedens een bezuuk an de provincie een “rondtie hunebedden” op oetneudiging van de Landdrost van Drenthe, Petrus Hofstede. Die hoopte dermet in de populaire vörst steun veur het behold van de Drèentse monumenten te vinden. En met succes!
Op 4 juli 2011 is de grote platte dekstien deur braandstichting scheurd en diels in het graf stört. De schade is begun december 2011 hersteld.
Bezuuk Professor van Giffen in 1918
Zo tröf e het an:
“Het hunebed verkeert in zeer vervallen staat, zoodat de oorspronkelijke toestand nauwelijks met zekerheid is vast te stellen “, stelt Van giffen in 1925. Een nogal hard oordiel, want hie treft wal 6 dekstienen, 2 sluutstienen, 9 ziedstienen, 2 poortstienen en maar liefst 12 raandstienen an, waorvan veul in situ. Inderdaod waren de 6 (van de 9) nog anwezige dekstienen weggleden, verplaotst of zölfs spleten. In de 4e dekstien zaten boorgaten veur springstof waoroet blek dat zie expres prebeerd hebt de boel kepot te maken. Allien de 6e grote platte dekstien steunt nog op de (4) draagstienen. Ok Van Giffen meldt de stunt van Lodewijk Napoleon en zien peerd. D45 is provinciaal eigendom.
(Bron: Atlas bij “De Hunebedden in Nederland”, dr.A.E.van Giffen, 1925)
Meer informatie over dizze en aander hunebedden in Drenthe zie www.hunebedden.nl en www.hunebeddeninfo.nl
Tekst Hans Meijer
Foto’s Hans Meijer en Davado
Vertaoling Willy Weerman
