Hunebed D47, Angelso in Emmen, Drents

Geplaatst door

938

D47 is het twiede hunebed in de wiek Angelslo. Veur dit monument is een klein terreintie tussen de flats van de Haselackers oetspaard. Van dit hunebed zint de tien zied- en de twie sluutstienen praktisch under het zaand verdwenen, waordeur de dekstienen op de grond liekt te liggen.

Van Giffen telde in 1918 mar twie dekstienen. Drie van de vief ontbraken. Ién wuur der in loop van de tied weervunden en herplaotst. Dat was de toestand tot 1997. Mar het monument was zo slim an vandalisme underhevig dat zie zölfs overweugen hebt um het weer under het zaand verdwienen te laoten. Veur dizze “nederlaog” wuur gelukkig niet keuzen. In tegendiel. Zie hebt het monument meer anzien (en hopelijk respect !) geven deur het met twie ‘vrömde’, mar goed passende stienen an te vullen. In juli 1997 zint die op de lege plekken legd zodat het hunebed non weer compleet lek. oorspronkelijk deur het kleurverschil met een nogal onnatuurlijk resultaot, maar zoas te zien is, zint de stienen undertussen perfect bijkleurd. Het blef vanzölf een wat ongebroekelijke actie, want as dit beleid worden zul, dan is der nog een bult wark an de winkel in Drenthe :-). Het terrein wordt regelmaotig inspecteerd en leg der non hemmel bij.

Locatie D47

Bezuuk Professor van Giffen in 1918

Nog meer as D46 lag dit armzalige restant van een prehistorisch monument in de kale vlakte bij Angelslo. Van Giffen vund het ook maar niks: “Het hunebed verkeert in een zeer onvolledigen en vervallen staat”, rapporteerde’ in 1925. Ondanks veul ontbrekende dek- en ziedstienen kun het grondplan dankzij 2 sluutstienen in situ, goed vaststeld worden; ongeveer 7 bij 2 meter. De dekstienen 1 en 2 waren der nog, de aander beide ontbraken. Een eventuele ingangspartij kun niet meer vaststeld worden, mar de restanten van de dekheuvel nog wal. Een hiele koppel vlinties in de umgeving van de kelder beschouwde’ as overbleven pakstienen van de dekheuvel. Het monument is in 1871 deur de Staat van een particulier opkocht.

(Bron: Atlas bij “De Hunebedden in Nederland”, dr.A.E.van Giffen, 1925)