Het hunebed-verhaal had nog ién verassing in petto: totaal onverwacht wuur der in 1982 bij graafwark t.b.v. een febrieksterrein under de wierde Heveskesklooster ten oosten van Delfziel, twie meter under de klei, een hunebed opgraven, en 2 jaor later ok nog een stienkist oet het neolithicum. (Wel wet wat der nog meer under de Grönningse klei verbörgen leg…) Het was boetendes nog iene van een bezunder type; wat de archeologen een ‘vergrote dolmen’ nuumt. Bij dit type zit de ingang niet in het midden mar an een oeteinde, op de plaots van een sluutstien.
Op de bewuste stee wuurden ok nog grote hoeveulheden eerdewerkscharven en vuurstienen vunden. De 6 zied-, 1 sluut-, en 3 dekstienen wuurden naor het Zeeaquarium in Delfziel overbracht en in de oorspronkelijke staot reconstrueerd. Veur € 4,50 was het te bezichtigen, en veur dat geld zagen ij dan ok nog een aquarium met Noordzeevissen, een schiere schelpencollectie en de scheepvaortgeschiedenis van Delfziel.
De stienkist is in het Hunebedcentrum in het Drèentse Börger te bewondern.
Officieel het dit reconstrueerde hunebed G5. Hoezo G5 ?. Waor zint G2, 3 en 4 ? Dat zint verdwenen hunebedden bij Glimmen. Van Giffen nummerde dizze hunebedden deur. Dat was niet consequent, umdat e dat in Drenthe niet dee. Daor gaf e verdwenen hunebedden een alfabetletter, toevoegd an het nog anwezige hunebed dat der het dichtste bij lag.
Locatie G2
Meer informatie over dizze en aandere hunebedden in Drenthe zie www.hunebedden.nl en www.hunebeddeninfo.nl
Tekst Hans Meijer
Fotografie Hans Meijer
Vertaoling Willy Weerman
