D26, het lèest opgraven hunebed in Nederland

Hunebed D26 leg tegen de bosraand, niet wied van Drouwen of. Het is bekend umdat het het lèest opgraven hunebed van Nederland is. Het is een middelgroot hunebed met vief dekstienen, allemaol netties op heur stee. Het oogt wat
leeg umdat de 12 zied- en 2 sluutstienen zowat under het zaand verdwenen zint. Daordeur lek het haost asof de dekstienen op de grond rust. D26 is ién van de 14 hunebedden waor nog ién of meer kransstienen te vinden zint. Hier zint der nog 13 van de oorspronkelijke 27. De 14 ontbrekende zint deur Professor Van Giffen met plombes markeerd. An de 4 nog anwezige poortdraagstienen is te zien dat dit graf een lange ingang had hef. Ok is de vörm van de oorspronkelijke heuvel nog goed zichtbaar.

Kaart omgeving Drouwen met hunebed D26. Kaort Hans Meijer

Routebeschrieving

Vanof de Gasselterstraot in Drouwen gaoj de Steenhopenweg in, daor koj allereerst al twie hunebedden an je linkerhaand tegen. IJ riedt under de autoweg N34 deur en gaot deur tot een krusing, daor gaoj linksof de Veldweg in (dus niet deurrien de bos in). IJ volgt dizze weg. Nao ’n klein poosie kreg de weg een bocht naor rechts (vanof hier het de weg Lunsveenweg) en kört daornao kuj weer naor links, mar daor gaoj rechtdeur over een zaandpad de bos in. Nao ca. 100 meter kuj rechtsof en dan ziej een kleine parkeerplaots bij een balk die de weg verspert. Hier zet ij je auto hen en loop ij een paar honderd meter langs de bosraand. Dan ziej het hunebed vanzölf verschienen.

Opgraving 1968

Dit hunebed is tussen 1968 en 1970 grondig deur archeologen u.l.v. Dr. Jan Albert Bakker van de Universiteit van Amsterdam underzöcht, en niet zunder rissultaot: op de keldervloer vunden ze de resten van 160 potten. Wieder vunden ze stienen wapens, gereedschap en barnstienen krallen. Véur de ingang tröffen ze een soort offerkoel an met 2 complete eerdewarken potten. D26 is het lèeste hunebed dat deur archeologen underzocht is. Wat betreft neie opgravings van hunebedden is men slim terugholdend worden. Van de iene kaant umdat men niet verwacht dat neie opgravings tot neie inzichten leiden zult, en van de aandere kaant umdat underzuuk gewis beschadiging van de oorspronkelijke toestand veroorzaakt. Toekomstige archeologen kunt dit met neie technieken misschien veurkommen.

Het instituut veur Pré- en Protohistorie van de Universiteit in Amsterdam hef de complete collectie van de opgraving van hunebed D26 oet 1968-1970 in broeklien schunken an het Hunebedcentrum in Börger. Dit is het ienige museum in Nederland dat een complete inventaris van een opgraven hunebed toont.

Reconstructie opgraving 1968

In 2017 is een reconstructie van de opgraving, oet 1968, naobouwd. Dit is te zien in het Oertiedpark van het Hunebedcentrum. Der is hiermet een relatie legd tussen de opgraving en de vondsten die in het museum te bewonderen zint.

Bezuuk Prof. Van Giffen in 1918

Een “beschadigd” hunebed waor de 5e dekstien van ontbrek, maar wal met 3 poortstienen en 10 kransstienen. Hierdeur concludeert Van Giffen dat de oorspronkelijke toestand “tamelijk dudelijk” is. Het basale diel van de anvankelijke dekheuvel treft e grotendiels nog an. De 12 zied- en 2 sluutstienen zint compleet en praktisch op de oorspronkelijke stee (in situ). D26 is sinds 1871 riekseigendom. Let op de roege onontgunnen heidevlakte van het Drouwenerveld van rond 1920.
(Bron: Atlas bij “De Hunebedden in Nederland”, dr.A.E.van Giffen, 1925)

Meer informatie over dizze en aander hunebedden in Drenthe zie www.hunebedden.nl en www.hunebeddeninfo.nl

Foto’s D26 (maakt deur Davado)

Vertaoling Willy Weerman