Home Drentse Verhaolen Hunebed D12 in Eext

Hunebed D12 in Eext

Door

19 januari 2018

1748

Dit bultie stienen leg der wat verlaoten bij, midden op de hooglegen Kampakkers, of Eexter Es. Het weggie der hen is boetendes stoer te vinden. Nim in Eext (zuudwest) in de neie villawiek de straot Venakkers. zowat an het einde van die straot voert een zaandpad links naor het hunebed.

Kaort van Eext (Hans Meijer) met de hunebedden in de umgeving, inclusief D12 der op.

Van dit ook oorspronkelijk kleine hunebed zint nog mar 3 dekstienen, 3 ziedstienen en 1 sluutstien over. De ontbrekende draagstienen zint deur Van Giffen met plombes markeerd. Die zint undertussen niet meer zichtbaar deurdat ze under het meiveld verdwenen zint.

De veurste stienen zint met körstmossen begruid. Hunebedstienen bliekt daor een goeie gruistee veur te weden. IJ treft ze (nog) op een koppel hunebedden an. Veur geïnteresseerden: die felle gele is de de Grove Geelkörst (Candelariella Vitellina).
In 1918 hef de beroemde professor Van Giffen het hunebed D12 bezöcht. Op een “roeg” terreintie op de Kampakkers bij Eext, overwoekerd deur struukgewas (Van Giffen vermeldt zölfs dat het een vledderstruuk en een liesterkrallenstruuk betreft) treft de archeoloog dit kleine ruïneerde hunebed aan. De 3 dekstienen steunt an de Zuudkaant op de 3 ziedstienen mar an de Noordkaant ligt zie op de grond deurdat daor de ziedstienen ontbreekt. Ok is der nog mar 1 sluutstien. Mar hie slöt de meugelijkheid niet oet dat die nog under de grond zit. Bij een later underzuuk (1952) is daor trouwens niks van bleken. De Provincie kreeg het monument in 1872 van de Markegenoten van Eext kedo.

(Bron: Atlas bij “De Hunebedden in Nederland”, dr.A.E.van Giffen, 1925)