In oeze Previncie-heufdstad Assen leg binnen de gemientegrèenzen ién hunebed en dat leg bij het rustieke esdorp Loon. Het is een middelgroot hunebed dat op de hoge Looner Es bij de ruilverkaveling leg. Tot 1870 gung dit hunebed nog diels schoel under zien dekheuvel. Toen vunden de “restaurateurs”, under het goedkeurend oog van de Commissaris van de Keunigin Mr. Gregory, het neudig um  dit archeologisch monument bloot te leggen. Volgens de toen gangbare opvatting waren de dekheuvels van hunebedden n.l. niet origineel, mar het gevolg van duunvörming.

D15. Foto Hans Meijer

Veer van de vief dekstienen ligt netties op heur stee; van de viefde is der nog mar een fragment over en dat leg op de bodem. Alle 12 zied- en sluutstienen zint der en ok de poort is compleet: 4 ziedstienen en een dekstien. Um het Loner hunebed leg nog een schiere ring van kransstienen. Der zint nog maar liefst 18 van de 23 over en dat is bezunder umdat dizzend bij de stienenroof in het verleden vaak as eerste verdwenen.

D15 luchtfoto

Dit schiere stuk eerdewerk wuur in 1974 geliek met een groot stuk brons en nóg zo’n soort beker illegaal oet de ingang van D15 opgraven. Het is een z.g. klokbeker oet de gelieknamige cultuur (2450 – 2000 v.C). Hoewal het volk oet dizze cultuur heur dooien miesttieds in grafheuvels begruuf,  wuurden der mangs nog welkend in hunebedden bijzet, of brachten zie der misschien allien nog offers. De vinders, 2 pubers oet Assen, hebt nao ienig andringen de vondsten aan het Drèents Museum overdragen.

klokbeker uit de Klokbekercultuur (2450 – 2000 v.C)

D15 is het ienige hunebed daj vanoet de trein zien kunt. (kiek 4 min. nao vertrek oet Assen richting Grönning rechts oet het raam)

Locatie D15 Loon

D15 Loon. Kaort Hans Meijer

Bezuuk Professor van Giffen 1918

De umgeving van Assen möt zo’n 80 jaar leden een troosteloze heidevlakte west weden. Wij zagen dat al bij D5 en non hier weer. Van Giffen schref over D15 : “Het verkeert, in weerwil van de aanwezigheid der talrijken kransstenen, in gehavenden staat”. Hieirbij bedoelt e waorschienlijk de toestand van de dekstienen. Ién hielemaol fragmenteerd en de 4 overigen “kanteld, verscheuven, vergleden of overkiept “. Met de 10 ziedstienen zat het redelijk goed, mar hie zette grote vraogtiekens bij de anwezigheid van meugelijke poortstienen. Ondanks dat siert D15 non weer een prachtige en volledige ingangspartij. Rissultaot van wat gis- en knooiwark dus. Mooi veur het volk, maar weinig wetenschappelijk aj ‘t mij vraogt.

(Bron: Atlas bij “De Hunebedden in Nederland”, dr.A.E.van Giffen, 1925)

D15 Loon, Atlas bij “De Hunebedden in Nederland”, dr.A.E.van Giffen, 1925

Meer informatie over dizze en aandere hunebedden in Drenthe zie www.hunebedden.nl en www.hunebeddeninfo.nl

Tekst Hans Meijer

Fotografie Hans Meijer en Davado

D15 Loon. Foto Davado

LAAT EEN REACTIE ACHTER

Please enter your comment!
Please enter your name here

Deze website gebruikt Akismet om spam te verminderen. Bekijk hoe je reactie-gegevens worden verwerkt.