Hunebed D17 Rolde, Drents

Geplaatst door

1081

De twieling D17 en D18 zint misschien wal de twie bekendste hunebedden in oes laand. Twie vrij grote hunebedden vlak bij mekaar, hiel best bereikbaar, under de rook van Assen. Zie ligt vlak achter de fraaie middelieuwse Jacobuskerk in Rolde. Zet je auto op het parkeerterrein achter ‘t kerkhof en loop over het royale deur doezenden toeristen platlopen hunebedterrein. D17 is de miest noordelijke. D18 leg 200 meter zudelijker en het valt vortdaolijk op dat die der hiel wat schierder bij leg. D17 gef een rommelige indruk. Het hef 8 dekstienen, waorvan der nog maar ién op zien “poten” stiet. De aandern zint hielemaol, of veur een diel van heur dragers ofgleden of ligt in stukken in het graf. Ién is finaal middendeur breuken. De dekstien in het midden valt op deur zien enorme ofmetings. Wieder zint der nog 15 zied-, 2 sluut- en 2 poortziedstienen. De iek bij D17 stiet der nog, mar daor is dan ok alles met zegd. Hie is deur de bliksem oethold. De holte is met teer insmeerd en wordt met iezern pennen in vörm holden. Het is een wonder dat e nog leeft. De ingang van het terrein wordt markeerd deur een riege van 19 flinke vlinten. Waren dit misschien ooit kransstienen? Een wal slim grote vlint drag het bronzen naambordtie.

Het veurtbestaon van beide hunebedden luup in 1847 groot gevaor toen de monumenten deur het Rolder markebestuur in de oetverkoop daon wuurden met as reële meugelijkheid dat ze sloopt worden zulden. Dit har eerst op provinciaal- en daornao op landelijk niveau grote protesten tot gevolg, wat oeteindelijk in 1872 nao veul juridisch gebekvecht tot gevolg har dat het Riek beide hunebedden veur een bedrag van f. 150,- kocht. Dizze affaire bleek later van grote betiekenis: het vörmde het publieke en bestuurlijke keerpunt in het veurdiel van het behold van oes prehistorisch arfgoed.

Locatie D17

D17 en D18 ligt pal achter de grote Jacobuskerk in het centrum van Rolde

Reuzenstienen op de Es

D17 en D18 zint oetvoerig beschreven deur provinciaal archeoloog Wijnand van der Sanden in zien in april 2007 verschenen boek “Reuzenstenen op de Es”

Reuzenstenen op de es – de hunebedden van Rolde is eind april 2007 verschenen en giet over de beide hunebedden die achter de Jacobuskerk in Rolde ligt. De grafmonumenten zint tussen 3400 en 3200 v. Chr. opricht deur boeren van de Trechterbekercultuur. Het boek giet oetvoerig in op de geschiedenis van beide monumenten naodat heur rol als graf oetspeuld is. Hoe hebt de talloze generaties tussen toen en non tegen dizze monumentale bouwsels ankeken en hoe zint zie der met umgaon? Zint het in de 17de eeuw nog deur roege, mèensenetende reuzen bouwde graven, in de loop van de 19de eeuw gaot provincie en Riek zu’k actief met de zörg veur dizze veuraolderlijke monumenten gangs holden. Het boek volgt de verschoeving in betiekenisgeving op de voet. De hunebedden van Rolde zint bezöcht deur schilders, tiekenaars, fotografen, schrievers, geleerden, bestuurders en zölfs leden van het keuningshoes. Zie waren under de indruk van wat zie zagen en legden heur gevulens in woord en beeld vast. Al dizze en aandere utings komt an bod.

Bezuuk Professor van Giffen an D17 in 1918

Van Giffen tröf dit hunebed “in droevigen staat” aan. De 8 dekstienen waren diels in stukken breuken verscheuven, ofgleden en in de kelder vallen. De 18 zied- en sluutstienen waren der nog wal, maar in veul gevallen oet het lood slaon. Hie nuumt de “fraaie eikenboom”, die der deur veul kuunst- en knooiwark nog aal stiet. Op de achtergrond het in 1948 opheven lokaalspoor Assen – Stadskanaal. Het stationsgebouw in Rolde stiet der nog.
(Bron: Atlas bij “De Hunebedden in Nederland”, dr.A.E.van Giffen, 1925)