Het gebied rond Börger möt een ideale vestigingsstee veur het Trechterbekervolk west weden. Binnen een straol van 5 km vind wij mar even 11 hunebedden, waorvan 5 bij het dörp Bronneger ten noorden van Börger. (D21 t/m 25). D21 is de mooiste en vanwege de archeologische vondsten, de belangriekste. Al hef e mar drie (mar wal slim grote) dekstienen, hie oogt hiel bezunder deur de indrukwekkende beuk die de functie van ién van de draagstienen overnummen hef, mar wieder ok het hiele beeld van het hunebed overheerst. Van de 8 zied- en 2 sluutstienen steekt allien de toppen boven het zaand oet, net as van de iene poortstien.
D21 is in 1918 deur Van Giffen grondig underzöcht; en mét rissultaot. Der wuurden, naost complete potten, scharven vunden van in totaal zo’n 600 stuks eerdewark. Net as bij de eerder deur hum underzöchte D53 en D30 bestun de bodem uit verscheiden vloerlaogen waorop en waortussen de artefacten vunden wuurden. Dus, as indertied de kelder vol was gung der een neie laog overhen en begunden zie opnei. Een meter under de grond, plat op de vloer van het graf, tröf Van Giffen een ontbrekende ziedstien an. Die möt al tiedens het gebroek van het graf umvallen weden. De stien wuur deur hum weer overèende zet. Nao ontruming van het graf bleef een lege keldervloer over van 6,50 bij 2,20 m. De hoogte varieerde van 1.50 tot 1.70 m, zodat ok dizze kelder op staohoogte van de toenmaolige (körtere) gebroekers ontwörpen is.
D21 is der ién van een twieling; D22 leg der vlak naost maar stelt niet veul veur. (2 dek-, 3 zied- en 2 sluutstienen).
Locatie D21, Bronneger
Bezuuk Professor van Giffen in 1918
Van Giffen telde hier 3 “zwaore” dekstienen, dragen deur 8 zied- en 2 sluutstienen. Oorspronkelijk miste e 1 sluutstien, mar die bleek umvallen te weden en in het graf te liggen. Ok vund e later nog een poortziedstien. Hie nuumt ok de 2 markante bomen: links een beuk en rechts een iek. De iek is later rooid maar de beuk stiet der nog aal en is in de loop van de tied nóg indrukwekkender worden. Het hunebed is in 1870 deur de Staot opkocht.
(Bron: Atlas bij “De Hunebedden in Nederland”, dr.A.E.van Giffen, 1925)
Meer informatie over dizze en aander hunebedden in Drenthe zie www.hunebedden.nl en www.hunebeddeninfo.nl
Tekst Hans Meijer
Fotografie Hans Meijer en Davado
Sfeerimpressie zunsundergang deur Davado
Nog meer sfeerbeelden deur Davado
