Home Drentse Verhaolen Hunebed D8, de Strubben/Kniphorstbos bij Anloo, Drents

Hunebed D8, de Strubben/Kniphorstbos bij Anloo, Drents

Geplaatst door

1467

D8 leg in het grootste archeologische monument van Nederland tussen Schipborg en Anloo. IJ komt der vanof de weg Schipborg – Anloo. Vanoet Anloo kommend ziej nao een paar kilometer an de rechterkaant van de weg een parkeerplaots (vlakbij het landschap de Schipborg). Hier kuj je auto henzetten. Daornao gaoj het zaandpad waoraj vort kommen zint op, en gaoj het gebied in. IJ volgt de zaandweg (lopend langs een fietspad). Nao ongeveer een kilometer ziej aan de rechterkaant een grafheuvel met ‘n stien derop, dat is een galgenbarg west. IJ volgt de zaandweg wieder en nao een paar honderd meter koj op een splitsing. Daor gaoj een meter of twintig naor rechts en ziej aan je linkerhaand het hunebed liggen. Het hunebed is op de fiets nog makkelijker vanoet Annen via de fietstunnel under de N34 deur te bereiken.

Het hunebed hef veer dekstienen die sekuur op de acht ziedstienen en twie sluutstienen ligt. Der is nog ién poortstien. De stee van de twiede is deur Van Giffen deur een cement-afdruk (een plombe) markeerd.

De Strubben / Kniphorstbosch is het grootste officiële archeologisch monument in Nederland.IJ vindt hier behalve 2 hunebedden (D7 en D8) een hiele koppel grafheuvels en prehistorische karrensporen.

Locatie D8

Bezuuk Professor van Giffen in 1918

Van Giffen tröf dit hunebed an in “het bosch van den Heer Kniphorst”. Hie gaf het monument het nummer D8 en beoordielde het “in zeer goed onderhouden staat” al was ‘t naor zien miening “tusschen 1848 en 1875 verkeerdelijk hersteld”. Mar goed, het was en is nog aal een fraai en compleet hunebed. Het wuur in 1871 deur de bos- en landgoedeigenaar Mr. C.E. Kniphorst an de Provincie schonken. Zien naam drag nog aal het undertussen tot archeologisch reservaat promoveerde gebied.

(Bron: Atlas bij “De Hunebedden in Nederland”, dr.A.E.van Giffen, 1925)