In de Staatsbos tussen Ees en Exloo staot een paar bezundere bomen, nl. de Sequoia Giganteum, hier ok wal Mammoetboom nuumd. Het is een exotische naaldboom die normaal in Californië gruit. Boswachter Meelkert hef in de jaoren ’20 / ’30 van de 20e eeuw een perceel bos inplant met verschillende exotische bomen en struken um te underzuken of bepaalde bomen hier in oes klimaat goed gedijen zulden. De Sequoia’s doet het wal aordig goed, want zie staot der nog, draagt vruchten en hebt non nao zowat 100 jaor al een beheurlijke umvang.
De boom is in meerdere opzichten bezunder te numen. Zo kan e under de juuste umstandigheden 3000 tot 4000 jaor aold worden en wal 80 meter hoog (dizze exemplaren zint dus nog mar net ontkiemd). Wieder is de bast körkachtig, aj der in drukt veert het flink terug en hie is enorm isolerend (luchtholdend). Dat hef tot gevolg dat as der een bosbraand oetbrek, de sapstroom veur de boom niet antast wordt en de boom dus niet dood giet. Tot slot zit in de bloesem een stof die een positieve invloed op de prostaat bij mannen hef en in een drank op de markt bracht wordt.
De vrucht zöt der ongeveer oet as een denappel (foto’s hierunder)
Aj de bomen vinden wilt, kuj het handigst parkeren op de parkeerplaots van vak 138 an de Bodenweg ongeveer 1 km vanof Ees. Steek de straot en fietspad over en loop de Rooie route tussen vaknr. 136 en 129 deur. Nao ca. 60 meter bög de rooie route linksof en zowat geliek weer linksof.
Nao ca. 400 meter ziej links een cirkelvormige leegte in de bos. Dat is een Pingoruïne, een overbliefsel van een Pingo oet de lèeste iestijd, die roem 10.000 jaor leden eindigde. Deur opwaartse waterdruk oet de grond, waorbij het ies aan het oppervlak bevreur ontstun der een heuvel met een ieslens der under, die later toen het warmer wuur smölt waorbij de grond naor boeten wegdreef en der een leegte met een wal der umhen in het laandschap ontstun.
Nao ca. 1 kilometer hej links een heideveldtie met wat oneffenheden. Dat zint overbliefsels van 7 grafheuvels bij mekaar. Het zint gien 7 meer, waorschienlijk zint der in het verleden een aantal van ofgraven. IJ loopt um het veldtie hen en an het briede pad ziej een informatiebordtie staon. Even veurbij het heideveldtie slaoj rechtsof een smaller kuierpad in langs bosvak 134. An de linkerkaant ziej het exotenbossie waor ik an het begun over schreef. Het is der vaak slim nat, dat hef te maken met de grondsoort. De Hondsrug bestiet veural oet zaand, ofwisseld met potklei. Dat is een praktisch ondeurdringbare grondsoort waordeur het regenwater moeilijk in de bodem wegzakt.
Aj ca. 300 meter deurloopt hej an de linkerkaant 2 bomen staon waorvan de stammen naor undern wat wied oetloopt. Aj over het slootie stapt en de bast vuult dan vuul ij an de veerkrachtige bast daj de juuste boom hebt.
Hiernao kuj weerum lopen, de rooie route oetlopen of ca. 50 meter deurlopen en dan linksof over het briede pad (vlinten die grotendeels overwoekerd zint deur gres) weerum lopen naor het fietspad en dat (linksaf) volgen tot de parkeerplaots op vak 138.
Bovenstaond kaortie komp oet de webstee van Staatsbosbeheer. In de site word ij aj deurklikt en de route opzuukt naor de parkeerplaots bij Hunebed D30 (rechtsunder op de kaort) stuurd, mar dat klopt niet, dat punt leg niet an de rooie route. Op het kaortie staot beide bomen even rechts van het markeringstieken veur Mountainbikeroute (2 stippen boven mekaar met een driehoek rechts daorvan) as 2 zwarte stippen weergeven.
Tekst en foto’s Willy Weerman
![Kaart met Valtherschans. Cornelis Pijnacker [Public domain]](https://www.hunebednieuwscafe.nl/wp-content/uploads/2019/01/Drenthe_door_Cornelis_Pijnacker-gehele-kaart-218x150.jpg "Valtherschans, Drents")
