Het Balloërveld, is ien van die gebieden in Drenthe waor aj mangs het idee hebt daj deur een openluchtmuseum kuiert. Het gebied leg midden in het Nationaal Park Drentsche Aa. Het is niet veur niks oetroepen tot een hotspot in het Hondsrug UNESCO Geopark. Tiedens een wandeling deur het terrein koj aal weer wat bezunders oet het verre verleden tegen. Eigenaar Staatsbosbeheer hef een route in het gebied oetzet. IJ kunt dizze wandeling vanof de twie parkeerplaotsen maken. Der loopt ok een paar schiere fietspaden deur het gebied hen.

Parkeerplaots (twie meugelijkheden): P-plaots Schaopskooi, Crabbeweg 2, Balloo of P-plaats Galgenriet, Gasterenseweg, Loon-Gasteren.

Het Balloërveld met op de achtergrond de kerktoren van Rolde. Vrogger lupen de hoofdroutes over het Hondsruggebied de kaant van dizze kerk op. Het was een baken in de grote heidevlaktes van Drenthe.

 

Locatie

Balloerveld. Foto Wikipedia

Wandelroute

Een wandelroute van 9 km (ok in te körten tot 4) is te vinden op de site van Staatsbosbeheer. https://www.staatsbosbeheer.nl/routes/drentsche-aa/wandelroute-ballooer-veld. De route is met paorse paolties angeven.

Vörmd gedurende meerdere iestieden

Het gebied is deur meerdere iestieden vörmd, in een periode van zowat een half miljoen jaor. In een stoefzaandvlakte komp gliensterzaand oet de Elster iestied teveurschien, veur de rest is het gebied met zaand, keiliem en vlinten in de Saale iestied vörmd. En dan hew de pingoruines die op het lèest van de Weichsel iestied, ongeveer 20.000 jaor leden, vörmd zint nog. Al met al een slim diverse ontstaonsgeschiedenis.

Balloërveld, gliensterzaand oet de Elster iestied. Foto Jannes van Echten

Heide

Het gebied is 367 hectare groot en daormet ien van de grootste heidegebieden van Drenthe. Het heideveld leg op een hooglegen plateau tussen de dalen van het Looner Diep en het Rolderdiep (as underdiel van het beekdalsysteem van het Drentsche Aa-gebied). De veurnamelijk heide- en vergreste heidebegruiïng wordt hier en daor ofwisseld met veenmeertjes, wat plukkies dennenbos en kleine zaandverstoevings

Heide op het Balloerveld.
De heide is hier en daor vergresd

Grafheuvels

Op het terrein zint verscheiden grafheuvels te vinden oet verscheiden periodes: de neie stientied, bronstied en de iezertied. Sommigen zint restaureerd. Een aantal hebt zölfs namen: Mandenbarg, Stakenbarg en Galgenbarg. De lèeste het niet veur niks de Galgenbarg. Die is lange tied, vanof de Middeleeuwen, gebroekt as heuvel met een galg derop, waor veroordielden oet de umgeving ophangen wuurden.

Ien van de grafheuvels op het terrein

Middeleeuwse karrensporen

Al doezenden jaoren lang loopt der belangrieke routes deur het gebied. Het zint de routes die over het Hondsrugplateau naor Rolde loopt. Vanof de Middeleeuwen wuur het intensiever gebroekt, veural deur karren, trökken deur ossen. Bij nat weer vuul het niet met um met een kar deur het zaand te rieden, daorum wuur dan naost het dienstdoende pad reden umdat de undergrond daor nog wat harder was. Dat hef der veur zörgd dat in de loop van de tied honderden meters briede sporenpatronen van aolde routes vörmd

Middeleeuwse karrensporen. De strepen zint goed zichtbaar in het laandschap (van linksunder naor rechtsboven op de foto

Restanten oet de Twiede Wereldoorlog

De Frieslandriegel is de naam veur het Drèentse diel van een anslutende linie van loopgraven, tankgrachten en zo ten oosten van de Iessel.  De linie wuur anlegd nao de snelle opmars van de geallieerden nao de landing in Normandië op 6 juni 1944; de verdedigingswarken waren bedoeld um een eventuele aanval vanoet het westen of te slaon. Zowat overal zint de restanten van dizze linie weer vortwarkt. Mar op een aantal plekken zint ze nog zichtbaar, zo ok in het Balloërveld. De loopgraven en tankgrachten zint der nog. Tiedens een wandeling over het terrein koj ze tegen.

Tankgracht op het Balloerveld

Schaopskudde

Vanof de parkeerplaots Crabbedijk 2 in Balloo loop ij in honderd meter naor de verneide schaopskooi van het Balloërveld. Overdag löp de kudde met 400 Drèentse heideschaop, met de scheper, in het gebied rond waor de schaop de heide in stand holdt. ’s Nachts staot de schaop in de kooi. Op het terrein is ok een informatiecentrum met winkeltie.

Der loopt veul briede zaandwegen deur het gebied, dat is nog een restant oet de tied dat het gebied deur het Ministerie van Defensie gebroekt wuur as oefengebied. Non zint het wandelpaden.

Vertaoling Willy Weerman

LAAT EEN REACTIE ACHTER

Please enter your comment!
Please enter your name here

Deze website gebruikt Akismet om spam te verminderen. Bekijk hoe je reactie-gegevens worden verwerkt.