Vlakbij Rolde, niet wied van Assen, leg het Tumulibos. Tumuli is een aander woord veur grafheuvel en dat is waj hier veul tegenkomt. Der zint in dit gebied roem 35 prehistorische grafheuvels bewaard bleven. Ooit zint der meer as 150 west. De heuvels ligt in een bebost terrein, an de weg Assen-Rolde, ter hoogte van Balloo.

De rooie stip gef het Tumulibos an
Tumulibos

Ontstaon van de grafheuvels

Het gebied van het tegenwoordige Tumulibos wuur in de neie stientied, bronstied en iezertied broekt as lèeste rustplaots veur de dooien. De miest zichtbare resten stamt oet de iezertied. De overledenen wuurden ter plekke verbraand, mar niet in urns plaotst, wat in veurgaonde eeuwen gebroekelijk was. De as wuur ofdekt met zaand of plaggen, waordeur een heuvel ontstun. Miestal ligt dergelijke braandheuvels in grote groepen bij mekaar.

Ien van de veule grafheuvels in het Tumulibos. Op de achtergrond ziej nog een paar liggen.

Veul grafheuvels en urnvelden zint in de middeleeuwen verdwenen. Zie hadden een slechte naam en wuurden in die tied in verbaand bracht met spoken en hekserij. In de zeuventiende eeuw oefenden de grafheuvels juust antrekkingskracht oet op lu die zu’k met geschiedenis gangs huulden. Johan Picardt hef hier tussen 1643 en 1648 al archeologisch underzuuk daon. In 1833 lagen der in dizze buurt nog een stuk of 150 grafheuvels, waorvan der non dus nog ongeveer 35 over zint. Het grootste diel van de grafheuvels verdween als gevolg van ontginning. Het terrein wuur in 1856 ankocht deur de provincie Drenthe. Het wordt sinds 2001 beheerd deur Stichting het Drentse Landschap.

Het Drentse Landschap hef in het gebied Kampsheide, dat der vlak bij leg, een wandeling oetzet ( het begunpunt van de wandeling is ook de parkeerplaots veur het bezuken van het Tumulibos). Tiedens dizze wandeling ziej grafheuvels, een pingoruïne, een hunebed, jeneverbessen en meer. De wandeling is te vinden op https://www.drentslandschap.nl/natuurgebied/kampsheide

Vertaoling: Willy Weerman

LAAT EEN REACTIE ACHTER

Please enter your comment!
Please enter your name here

Deze website gebruikt Akismet om spam te verminderen. Bekijk hoe je reactie-gegevens worden verwerkt.